Sulmuesi 19-vjeçar nga Nigeria, Alele Xhunior Obele, ka tërhequr vëmendjen e të gjithëve pasi u shfaq te Vllaznia në seancat stërvitore.
Obele u bashkua me shkodranët rreth tre muaj më parë, ku spikati menjëherë me ekipin B duke shënuar shtatë gola në dhjetë ndeshje dhe duke fituar titullin kampion në Kategorinë e Tretë.
Sipas raportimeve të fundit, anësori i majtë aktualisht është pa një kontratë me klubin kuqeblu. Talentit afrikan i ka kushtuar vëmendje edhe media e njohur “Africafoot”, e cila raporton se për shërbimet e tij ka interes të lartë nga klube në Itali, Francë, Bullgari, Greqi dhe Katar.
Pavarësisht kësaj periudhe merkatoje të nxehtë, Obele po vijon rregullisht përgatitjet në Shkodër, teksa Vllaznia po bëhet gati për sfidat e turit të parë në Ligën e Konferencës.
