Presidenti i Federatës së Futbollit të Arabisë Saudite, Yasser al-Misehal ka njoftuar dorëheqjen e tij pasi ekipi kombëtar i Arabisë u eliminua nga Kupa e Botës 2026, shkruan Al Jazeera.
Arabia Saudite përfundoi e fundit në Grupin H me dy pikë pas një barazimi 1-1 me Uruguain, një barazimi pa gola me debutuesit e turneut, Kepin e Gjelbër, dhe një humbjeje të rëndë 4-0 ndaj favoritëve për titull, Spanjës.
“Dështimi i ekipit kombëtar për t’u kualifikuar për raundin tjetër të Kupës së Botës është një rezultat që nuk i përmbush të gjitha ambiciet tona, dhe unë mbaj përgjegjësi të plotë për të. U kërkoj ndjesë të gjithë atyre që shpresonin ta shihnin ekipin tonë në një pozicion më të mirë”, shkroi Yasser al-Misehal në X.
“Një ndjenjë përgjegjësie kërkon dhënien e mundësisë për të hapur një kapitull të ri, dhe unë kam vendosur të mos vazhdoj deri në fund të mandatit tim aktual”, shtoi ai.
Si kreu i federatës për shtatë vjet, Al-Misehal luajti një rol kyç në përpjekjen e suksesshme të Arabisë Saudite për të pritur Kupën e Botës 2034.
Arabia Saudite luajti në Kupën e Botës të tretë radhazi këtë vit. Kampionët tre herë të Azisë nuk kanë arritur në fazat eliminatore që nga raundi i 16-të në vitin 1994.
Arabia Saudite ishte midis shtatë ekipeve aziatike që u eliminuan në fazën e grupeve, pasi vetëm Japonia dhe Australia avancuan në raundin e 32-të të më të mirave.
Një seri rezultatesh të dobëta në ndeshjet miqësore përgatitore në mars i kishin kushtuar tashmë trajnerit francez Herve Renard largimin nga Arabia Saudite, duke i dhënë fund një periudhe të dytë të Renard pasi ai u rikthye për të zëvendësuar italianin Roberto Mancini.
Arabia Saudite ka investuar gati 2 miliardë dollarë në futboll gjatë tre viteve të fundit, duke joshur Cristiano Ronaldon, Neymar, Benzema dhe shumë futbollistë të tjerë shumë të njohur në Ligën Profesionale Saudite, tani një nga kampionatet më fitimprurëse në botë.
