Vllaznia mund të përballet me një largim të rëndësishëm nga skuadra. “Shkodra Sot” raporton se portieri shkodran Aron Jukaj është në shënjestrën e një ekipi nga Arabia Saudite, i cili ka hedhur hapat e parë për të siguruar shërbimet e tij.
I dalë nga Akademia e Vllaznisë, Jukaj ka fituar besimin e stafit teknik falë paraqitjeve të qëndrueshme në ndeshjet e fundit, duke u konfirmuar si një portier me perspektivë dhe garanci për të ardhmen. Interesi nga Lindja e Mesme është konkret dhe mund të hapë një kapitull të ri në karrierën e tij, edhe pse për momentin ai mbetet pjesë e planeve të trajnerit Edi Martini.
Klubi kuqeblu ende nuk ka marrë një vendim përfundimtar. Megjithatë, nëse oferta që pritet të mbërrijë në ditët në vijim do të rezultojë bindëse, atëherë Aron Jukaj mund të jetë emri i radhës nga Shkodra që nis një aventurë jashtë vendit.
