Al Ittihad do të zhvillojë ndeshjen e radhës në kampionatin e Arabisë Saudite kundër ekipit të Al Qadsiya këtë të enjte.
Pas rezultateve të fundit, kampionët në fuqi synojnë rikthimin te fitorja në këtë sfidë që do të luhet në transfertë. Trajneri Sergio Conceicao ka paralajmëruar ndryshime në formacionin bazë për këtë takim.
Ndër zhvillimet kryesore pritet të jetë rikthimi i mbrojtësit të kombëtares shqiptare, Mario Mitaj, në listën e të grumbulluarve.
Mitaj ka munguar në katër ndeshjet e fundit për shkak të vendimeve teknike të trajnerit lidhur me limitin e lojtarëve të huaj. Rregulloret e kampionatit lejojnë vetëm tetë lojtarë të huaj në protokollin e ndeshjes, çka ka penalizuar mbrojtësin kohët e fundit.
Kjo periudhë jashtë fushave është më e gjata për lojtarin që prej transferimit të tij. Përveç katër ndeshjeve jashtë për zgjedhje teknike, ai ka munguar edhe në një javë tjetër për shkak pezullimi nga kartonët.
