Sulmuesi i Tiranës, Serge Tabeku, mund të largohet nga kryeqyteti në këto ditë të fundit të merkatos së dimrit, pasi po monitorohet nga klubi qipriot Akritas Chlorakas.
29-vjeçari kamerunas është aktualisht sulmuesi më efektiv i bardhebluve, duke shënuar pesë gola në kampionat gjatë këtij sezoni. Tabeku u afrua me bujë në verë dhe konsiderohet një pikë kyçe në formacionin e Tiranës, ku renditet i dyti për minuta të luajtura pas portierit Tafas, duke humbur vetëm një takim për shkak skualifikimi.
Një rikthim i mundshëm në Qipro nuk është i papritur, duke qenë se më parë ai ka qenë pjesë e skuadrës Nea Salamis në këtë kampionat.
Megjithëse gëzon një pagë të lartë te Tirana, vlera e tij në treg aktualisht renditet pas lojtarëve si Fredi Alvarez apo Patrik Mysloviç. Mbetet për t’u parë nëse palët do të arrijnë një marrëveshje përpara mbylljes zyrtare të afatit të kalimeve.
