Klubi i Cagliarit ka njoftuar zyrtarisht ndërprerjen e parakohshme të huazimit të portierit Alen Sherri te skuadra e Frosinones.
Gardiani shqiptar ishte huazuar gjatë merkatos verore me qëllim aktivizimin e rregullt në Serinë B, por nuk arriti të stabilizohej si titullar. Gjatë qëndrimit te Frosinone, ai u aktivizua vetëm në një ndeshje të Kupës së Italisë kundër Monzës.
Sipas njoftimit të klubit sard, futbollisti do të vihet menjëherë në dispozicion të stafit teknik për pjesën e mbetur të sezonit. Sherri ishte i pranishëm në tribunë gjatë ndeshjes së fundit të Cagliarit kundër Milanit për të ndjekur ekipin e tij.
Pritet që ai të mbajë rolin e portierit të dytë, duke shërbyer si zëvendësues i titullarit Elia Caprile. Deri më tani, portieri ka regjistruar gjithsej tetë paraqitje me fanellën e klubit të Cagliarit. Ky rikthim në bazë synon të plotësojë organikën e portierëve për sfidat e ardhshme në kampionat.
