Egnatia ka arritur një fitore të rëndësishme në garën për titullin kampion, duke mposhtur Elbasanin me rezultatin e pastër 4-0 në sfidën e dytë të fazës “Final Four”.
Skuadra rrogozhinase arriti të zgjidhte fatin e takimit që në pjesën e parë, falë një loje dominuese dhe efikasiteti të lartë para portës kundërshtare. Seria e golave u hap në minutën e 28-të, kur sulmuesi Bakayoko zhbllokoi rezultatin me një goditje të fortë nga jashtë zonës së rreptësisë.
I njëjti lojtar u shfaq përsëri protagonist në minutën e 45-të, duke dyfishuar shifrat për ekipin e tij. Përpara se skuadrat t’u drejtoheshin dhomave të zhveshjes, mesfushori Fernando shënoi edhe golin e tretë përmes një ekzekutimi teknik.
Në pjesën e dytë, Elbasani u përpoq të reagonte dhe të ndryshonte rrjedhën e lojës, duke krijuar disa raste shënimi. Sidoqoftë, sulmuesi Tsague nuk u tregua i saktë përpara portës, duke goditur shtyllën dhe duke mos gjetur dot rrjetën. Rezultati përfundimtar i sfidës u vulos në minutën e 88-të nga Albano Aleksi, i cili u tregua i saktë nga pika e bardhë e penalltisë, pas një rënieje brenda zone të fituar nga Flamur Ruçi.
Me këtë sukses, Egnatia arrin kuotën e 31 pikëve në renditje, duke u barazuar përkohësisht me Elbasanin dhe Vllazninë në tabelën e klasifikimit të fazës finale. Në javën e ardhshme, rrogozhinasit do të diskutojnë pikët në një përballje direkte me Vllazninë, ndërsa skuadra e Elbasanit do të kërkojë kthesën në takimin ndaj Dinamos.
RENDITJA:
Vllaznia: 31 pikë
Egnatia: 31 pikë
Elbasani: 31 pikë
Dinamo: 27 pikë
