Elbasani triumfoi pastër me rezultatin 3-0 ndaj Dinamos, në raundin e dytë të “Final Four”. Ky rezultat, konfirmon se titulli do të vendoset në javën e fundit.
Sfida nisi me verdheblutë më kërkues, të cilët provuan të gjenin avantazhin sa më shpejt. Në minutën e 9-të, Teqja i mohoi festën e avantazhit Tsague, ndërsa ekuilibrat u prishën në minutën e 20-të.
Mesfushori i Dinamos, Gudiaby u ndëshkua me karton të kuq për një ndërhyrje të ashpër ndaj Manellarit. Në superioritet numerik, Elbasani u hodh në sulm dhe gjeti avantazhin.
Në minutën e 25-të, Tsague shfrytëzoi në maksimum një krosim nga Loukili dhe me kokë, e ndali topin në fundin e rrjetës. Vetëm dy minuta më vonë, sulmuesi dyfishoi shifrat.
Tsague shfrytëzoi në maksimum një gafë të mbrojtësit Jorgo Meksi dhe e ndali topin në fundin e rrjetës me nhë parabël.
Dinamo u shfaq e pafuqishme për të reaguar, ndërsa pjesa e parë foli vetëm për Elbasanin. Diallo shpërdoroi dy raste, para se shënonte të tretin.
Sulmuesi përfitoi nga një top i grushtuar nga Teqja pas gjuajtjes së Loukilit, për të dërguar shifrat në 3-0. Para pushimit, Tsague dhe Lajthia iu afruan të katërtit, por u ndalën nga Teqja.
Fraksioni i dytë i lojës ishte i qetë dhe me raste me pikatore. Loukili tentoi në dy raste, por fillimisht u ndal nga Teqja, ndërsa më pas topi shkoi mbi portë.
Në fund të takimit, e gjithë festa ishte për Elbasanin, që ngjitet në kuotën e 34 pikëve, në vendin e dytë, po aq sa Egnatia kryesuese.
LEXO EDHE: Llogaritë, titulli kampion në Shqipëri vlen mbi 1 milion euro
Verdheblutë shpresojnë në një ndalesë të rrogozhinasve në javën e fundit. Në rast se kjo ndodh, Elbasani me një fitore ndaj Vllaznisë, do të shpallej kampion. Shkodranët mbajnë vendin e tretë me 31 pikë.
Dinamo ka dalë zyrtarisht jashtë garës për titull, pas mban vendin e katërt me 27 pikë, kur ka mbetur vetëm një raund për tu luajtur.
Ndeshjet Vllaznia-Elbasani dhe Egnatia-Dinamo, do të luhen të dielën e 31 majit, duke nisur nga ora 19:00, në stadiumet “AIr Albania” dhe “Elbasan Arena”.
RENDITJA:
EGNATIA 34 pikë
ELBASANI 34 pikë
VLLAZNIA 31 pikë
DINAMO 27pikë
