Kombëtarja shqiptare e Socca-s, luan një ndeshje shumë të rëndësishme në “Shtëpinë e Futbollit”. Kuqezinjtë do të përballen me Serbinë në çerekfinalen e Kampionatit Europian, që mbahet në vendin tonë. Pas suksesit ndaj Francës me penallti, Shqipëria do të kërkojë një tjetër triumf, këtë herë në një ndeshje tejet delikate dhe me interes të madh për tifozët.
Takimi nis në orën 18:45, ndërsa më poshtë mund të ndiqni transmetimin zyrtar të ndeshjes nga kanali i Federatës Ndërkombëtare të Socca-s:
Deri në këtë fazë, Shqipëria ka treguar një formë të jashtëzakonshme, në grup dhe në fazën me eliminim direkt. Kombëtarja e nisi me një fitore spektakolare me rezultatin e thellë 5-0 ndaj Turqisë, ndeshje e zhvilluar në “Shtëpinë e Futbollit”. Bindëse ishte paraqitja edhe në ndeshjen e dytë ndaj Qipros, ku Shqipëria triumfoi minimalisht, me golin e shënuar nga Xhuljano Reçi.
Në duelin e fundit në grup, Shqipëria u mposht 3-2 nga Sllovenia, por pikët e arritura në dy sfidat e para, i lejuan të kalonin grupin. Në fazën e 1/8-ve, kundërshtar ishte Franca. Koha e rregullt u mbyll në barazim 2-2, me kuqezinjtë që ia dolën të triumfojnë falë penalltive. Kundërshtari i radhës është Serbia, ndeshje që do të luhet duke nisur nga ora 18:45.
