FIFA ka marrë vendimin përfundimtar lidhur me praninë e tifozëve në ndeshjen Serbi-Shqipëri. Federata Serbe e Futbollit është dënuar me mbylljen e pjesshme të stadiumit të Leskovcit, ku do të zhvillohet ndeshja.
Ky vendim erdhi pas incidenteve që ndodhën në Beograd gjatë ndeshjes Serbi-Angli muajin e kaluar. Sipas raportimeve të mediave serbe, në stadium më 11 tetor do të lejohen vetëm 6,500 tifozë, nga kapaciteti prej 8,136 vendesh.
Përveç kësaj mase, Federata Serbe është gjobitur edhe me 80 mijë franga zvicerane. Serbët kishin kërkuar që ndeshja të mos zhvillohej në Beograd, për shkak të situatës së tensionuar në kryeqytet. FIFA ka paralajmëruar se në rast të incidenteve të tjera mund të ketë dënime më të rënda.
Kjo përballje konsiderohet vendimtare, pasi Serbia dhe Shqipëria garojnë për vendin e dytë në grup që siguron “play-off”-in drejt Kupës së Botës 2026.
