Albania's Rey Manaj celebrates after scoring his side's opening goal during the World Cup Group K qualifying soccer match between Serbia and Albania, at the Dubocica Stadium in Leskovac, Serbia, Saturday, Oct. 11, 2025. (AP Photo/Darko Vojinovic)
Federata e Futbollit të Serbisë është dënuar nga FIFA pas ndeshjes ndaj Shqipërisë. Arsyeja lidhet me sjelljet e papërshtatshme të tifozëve gjatë ndeshjes dhe këndimit të himneve kombëtare.
Sanksioni përfshin një gjobë prej 87,500 franga zvicerane dhe mbylljen e pjesshme të 25% të tribunave në stadiumin e Leskovacit, për sfidën kundër Letonisë. Federata serbe ka vendosur gjithashtu të mos marrë përsipër organizimin e tifozëve për ndeshjen e ardhshme me Anglinë në “Wembley”.
Kjo masë vjen si pasojë e shqetësimeve për përsëritjen e incidenteve në transfertë.
Në njoftimin zyrtar, Federata ka kërkuar nga tifozët që të respektojnë rregulloret dhe parimet e lojës së ndershme. Gjithashtu, është theksuar rëndësia e mbështetjes së ekipit kombëtar në mënyrë sportive dhe pa incidente.
NJOFTIMI I FEDERATËS:
“Komiteti Disiplinor i FIFA-s ka marrë një vendim në lidhje me ndeshjen kualifikuese të Botërorit 2026 midis ekipeve kombëtare të Serbisë dhe Shqipërisë, e luajtur më 11 tetor 2025.
Federata e Futbollit e Serbisë është gjobitur me 87,500 franga zvicerane për sjellje të papërshtatshme nga tifozët gjatë këndimit të himneve kombëtare dhe sjellje diskriminuese nga një pjesë e publikut gjatë ndeshjes, si dhe masën e mbylljes së pjesshme të të paktën 25% të kapacitetit të tribunave(kryesisht pas portave) në ndeshjen e ardhshme të ekipit kombëtar serb në kuadër të garës së FIFA-s, kundër Letonisë në Leskovac.
Duke marrë parasysh përvojat e kaluara dhe milionat e gjobave të paguara jo vetëm kur ndeshjet luhen në fushën tonë, por edhe për shkak të incidenteve në ndeshjet jashtë fushe, Federata e Futbollit e Serbisë nuk do të marrë përsipër shitjen e organizuar të biletave për sektorin jashtë fushe në stadiumin ‘Wembley’, as nuk do të jetë përgjegjëse për sjelljen e tifozëve në ndeshjen e ardhshme me ekipin kombëtar të Anglisë.
Federata e Futbollit e Serbisë u bën thirrje të gjithë tifozëve që të respektojnë rregulloret dhe parimet e lojës së ndershme, si dhe të ndihmojnë ekipin kombëtar me mbështetjen e tyre në një frymë sportive dhe pa incidente.
