Situata te Flamurtari është rënduar ndjeshëm pas humbjes 2-1 ndaj Bylisit në javën e 29-të të Superiores.
Shkak i “tërmetit” në klub është bërë një penallti e shkaktuar nga kapiteni Lorenc Trashi, veprim që ka sjellë reagimin ekstrem të presidentit Sinan Idrizi.
Ky i fundit, ka marrë vendimin për largimin e menjëhershëm dhe përfundimtar të Trashit nga skuadra. Vetë lojtari, i kontaktuar nga emisioni “Mega Sport”, ka paralajmëruar se nuk do të qëndrojë në heshtje. Edhe pse aktualisht ndodhet në një gjendje të rënduar emocionale, Trashi ka deklaruar shkurtimisht se së shpejti do të flasë publikisht dhe se deklaratat e tij do të jenë “bomba”.
“Kemi kontaktuar me lojtarin, i kemi shkruar mesazh dhe ka thënë se do flas. Natyrisht gjendja e tij është e rëndë. Ndër të tjera për emisionin tonë, Trashi ka thënë: Prisni, do flas dhe do ketë bomba”, u shpreh moderatori Altin Sulçe.
Ky zhvillim vjen në një moment kritik për Flamurtarin, i cili po lufton për mbijetesë dhe sapo kishte akorduar premio të majme për ekipin.
