Vdekja e Diogo Jotës gjatë verës ka sjellë reagime të shumta, duke qenë se ai ishte një lojtar i dashur për tifozët e Liverpool-it dhe Portugalisë.
Së fundmi, revista portugeze “TvGuia” publikoi në kopertinë një foto të bashkëshortes së tij, Rute Cardoso, duke u përqafuar me Ruben Neves. Revista la të kuptohej se mes tyre kishte diçka përtej miqësisë familjare.
Ky publikim nxiti reagimin e menjëhershëm të Ruben Neves në rrjetet sociale. Ai theksoi se prej më shumë se 11 vitesh është i martuar dhe se familja e tij është e lumtur dhe e qëndrueshme. Neves u shpreh se fotoja ishte keqpërdorur dhe se ai dhe gruaja e tij kanë ndihmuar Ruten dhe familjen e saj pas ngjarjes.
Ai theksoi se nuk respekton ata që nuk respektojnë të tjerët dhe shprehu mbështetjen për Ruten në këtë periudhë të vështirë.
“Mirëdita. Unë gjithmonë besoj në të mirën e njerëzve. Më kanë paralajmëruar të mos e bëj, kam gabuar tashmë dhe nuk i dëshiroj kurrë të keqen askujt. Personi që e vendosi këtë foto në kopertinën e revistës nuk meriton të jetë i lumtur, ashtu siç zgjedhja e tij nuk ishte e mirë.
Unë dhe gruaja ime, së bashku për më shumë se 11 vjet, jemi të lumtur, me një familje që më bën krenar. Asnjëherë në 11 vjet nuk kemi qenë të përfshirë në ndonjë polemikë. Kemi bërë çmos për të ndihmuar Ruten dhe familjen e saj sa më mirë që mundëm. Zgjedhja e kësaj fotoje është po aq e pafat sa personi që e zgjodhi dhe personi që e publikoi. Unë respektoj faktin që secili ka punën e vet, respektoj që secili dëshiron të japë më të mirën e tij, nuk i respektoj ata që nuk i respektojnë të tjerët. Edhe një herë, jam krenar për gruan që kam, për familjen që kam. Jemi krenarë për Ruten, për forcën që kishte. Ne jemi këtu për çdo gjë, ajo e di këtë”, ka shkruar Neves.
