Përballja mes Elbasanit dhe Vllaznisë e mbyllur në barazim 1-1 shkaktoi polemika të mëdha dhe rrezikon të sjellë dënime të rënda.
Në qendër të vëmendjes është presidenti i Vllaznisë, Alban Xhaferi, i cili goditi me grusht asistentin e dytë Ergys Spahiu pas përfundimit të ndeshjes.
Pamjet filmike kanë qarkulluar gjerësisht, ndërsa ndërhyrja e sigurisë shmangu përshkallëzimin e mëtejshëm të incidentit. Ndonëse Xhaferi kërkoi falje publike për veprimin, Komisioni i Disiplinës dhe Etikës pritet të zbatojë Nenit 49 të Kodit të Disiplinës Sportive.
Ky nen parashikon një pezullim minimal prej 18 muajsh për çdo zyrtar ose president klubi që ushtron dhunë ndaj zyrtarëve të ndeshjes. Përveç tij, nën hetim është edhe trajneri Edi Martini, i cili u ndëshkua me karton të kuq për protesta dhe gjeste ndaj bankinës së arbitrave.
Tashmë vendimi përfundimtar i përket FSHF-së, e cila do të përcaktojë masën e sanksioneve disiplinore për dy drejtuesit e klubit shkodran. Vendimi i Komisionit të Disiplinës do të publikohet këtë të mërkurë të 2 shtatorit.
