Eldorian Hamiti është kthyer në qendër të polemikave pas eliminimit të Partizanit nga Kupa e Shqipërisë prej Elbasanit. Ndeshja, e cila u mbyll me fitoren 1-3 të verdhebluve pas 120 minutash lojë, u karakterizua nga vendime tejet të diskutueshme që kanë bërë që klubi i kuq ta shpallë gjyqtarin lezhjan “Non Grata”.
Polemikat nisën në kohën shtesë, ku brenda pak minutash u kontestuan dy raste për penallti: një prekje e topit me dorë nga Musta dhe një goditje me bërryl e Fadairos ndaj Kasës.
Megjithatë, kulmi arriti në minutën e 119-të, kur Hamiti akordoi një penallti vendimtare për Elbasanin, vendim që sipas Partizanit komprometoi rëndë garën.
Ky nuk është incidenti i parë për Hamitin këtë sezon. Më 14 shkurt, ai u shpall “Non Grata” edhe nga klubi i Bylisit pas gabimeve të shumta në ndeshjen ndaj Teutës.
Pas asaj sfide, Hamiti u pezullua për dy javë nga Superiorja, duke gjykuar në Kategorinë e Parë, por rikthimi i tij në elitë rezultoi sërish problematik.
Tashmë, me dy etiketime “Non Grata” brenda pak javësh, e ardhmja e tij në Superiore është në pikëpyetje të madhe, ndërsa pritet një tjetër pezullim i gjatë nga ana e FSHF-së.
