Kombëtarja shqiptare rikthehet në fushë këtë të mërkurë për ndeshjen miqësore ndaj Izraelit, pas përfundimit të rrugëtimit për kualifikimin në Kupën e Botës 2026.
Takimi do të shënojë debutimin e trajnerit Rolando Maran në pankinën kuqezi. Italiani pritet të ketë pak dilema për formacionin, ndërsa një nga risitë mund të jetë aktivizimi i Luis Hasës në rolin e fantazistit pas sulmuesit kryesor.
Në mbrojtje, pas largimit të Ardian Ismajlit nga grumbullimi, pritet të luajnë Arlind Ajeti dhe Berat Gjimshiti, me Elseid Hysajn dhe Mario Mitajn në krahë.
Në portë favorit mbetet Alen Sherri, ndërsa në mesfushë pritet të aktivizohen Juljan Shehu dhe Kristjan Asllani.
Myrto Uzuni dhe Nedim Bajrami pritet të mbështesin sulmin, ku në majë mund të rikthehet Armando Broja. Kjo do të jetë ndeshja e shtatë mes Shqipërisë dhe Izraelit, me kuqezinjtë që kanë regjistruar dy fitore dhe katër humbje në gjashtë përballjet e mëparshme.
