Përballja e javës së dytë mes Skënderbeut dhe Dinamo City-t ka marrë një kthesë të papritur sa i përket pranisë së publikut. Komisioni i Disiplinës pranë FSHF-së ka dhënë dritën e jeshile që takimi të zhvillohet me tifozë në shkallët e stadiumit.
Vendimi vjen pas interpretimit zyrtar të rregullores lidhur me dënimin prej dy ndeshjesh pa spektatorë që rëndonte mbi klubin korçar. Duke qenë se dënimi specifikonte mungesën e spektatorëve dhe jo mbylljen e stadiumit, sfida e zhvilluar në Shkodër shleu gjysmën e parë të pezullimit.
Me shlyerjen e gjysmës së dënimit, rregullorja i lejon klubit bardhekuq të konvertojë pjesën e mbetur me gjobë financiare. Kështu, drejtuesit do të paguajnë detyrimin përkatës për të shmangur zhvillimin e ndeshjes me tribuna të boshatisura.
Ky zhvillim konsiderohet si një lajm mjaft pozitiv për ekipin e Skënderbeut që do të ketë mbështetjen e tifozërisë me Dinamon.
Kështu, më 31 gusht në orën 18:30, stadiumi i Korçës do të hapë dyert për mbështetësit vendas.
