Trajneri i Partizanit, Mlladen Milinkoviç, ka theksuar se kishte mbetur i zhgënjyer nga fakti se lojtarët e tij kishin pësuar gola edhe pse në teori kishin përgatitur gjithçka siç duhej për mënyrën e lojës së Vllaznisë.
“Fillimisht dua të përgëzoj Vllazninë për fitoren dhe së dyti dua t’u kërkoj falje tifozëve tanë për rezultatin. Kjo është padyshim diçka jo e mirë për ne. Ne shënuam vetëm një gol në tre ndeshje dhe për 5 minuta kemi shkatërruar të gjithë ndeshjen. Ky është momenti kur pëson në minutat e fundit, nuk është e mirë për lojtarët dhe nuk ndjehesh mirë. Por nuk duhet të dorëzohesh dhe duhet të vazhdosh deri në fund të ndeshjes.
Kishin shumë raste për të shënuar, në disa momente Hoxha ishte vendimtar dhe na shpëtoi. Por jam i mërzitur, se ata bënë gjithçka siç e pritnim, ata krijuan rastet nga momentet që provuam gjatë javës, dhe ky është problemi më i madh për mua. Nuk e dinim se kush do luante, por e dinim si do të luanin. Ishin shumë të rëndësishëm në çdo tranzicion dhe kjo është ajo që kemi punuar në këto ditë, e dinim që do ishin të rrezikshëm se kanë lojtarë shumë të mirë.
Ne deshëm të interpretonim lojën në një mënyrë. Në fund kaluam me tre, ndoshta për 10 minuta ishim në rregull por pas golit të dytë nuk funksionoi më.
Ne punojmë dhe u përgatitëm që Vllaznia përdorte hapësira mes linjave. Por problemi ishte koha e presionit në shumë situata. Sa i përket pjesës së menaxhimit, kishim situatë ku ta bënim 2-0. Kur nuk shënon raste të pastra, edhe ekipi bie moralisht. Nuk është alibi. Do analizojmë ndeshjen, puna ime është të bëj gjithçka pas çdo ndeshje pavarësisht rezultatit, çfarë mund të bëjmë mirë e si të jemi në ndeshjen tjetër. E rëndësishme është se ku do të jemi në fund”, tha Milinkoviç për RTSH pas ndeshjes.
