Përfundimi i sfidës Partizani-Vllaznia është shoqëruar me tensione në studion e emisionit “SuperGol” në RTSH, ku trajnerët e të dyja skuadrave patën shkëmbime batutash dhe debatesh me moderatoren Hygerta Sako.
Gjithçka nisi me teknikun e shkodranëve, Edi Martini, i cili e hapi prononcimin e tij me një ironi drejtuar studios, duke u shprehur: “Shpresoj të mos jeni mërzitur”. Situata u përshkallëzua kur Sako kërkoi informacion mbi dëmtimin e lojtarit Bajrami, pyetje së cilës Martini iu përgjigj duke thënë se nuk ishte mjek dhe se nuk kishte pyetur për gjendjen e tij.
Debati vijoi edhe me trajnerin e Partizanit, Oltijon Kërnaja, i cili i ktheu përgjigje moderatores lidhur me vërejtjet për goditjet standarde, duke ironizuar angazhimin e saj në Big Brother.
Pas përfundimit të lidhjeve direkte, Sako reagoi ashpër ndaj sjelljes së trajnerit Martini, duke e cilësuar atë si të paedukatë dhe joetik në raport me gazetarët. Moderatorja theksoi se përveç sjelljeve ndaj kundërshtarëve, tekniku po shfaqte mungesë etike edhe në komunikimin publik, duke e mbyllur emisionin me një përshëndetje ironike drejtuar tij.
“Nuk paska qenë superndeshje sot, paska qenë çmenduri se edhe ky i pakënaqur, edhe Edi i pakënaqur”, tha Ardi Behari në studio.
“Jo, Edi u tregua i paedukatë në fakt. Përveç sjelljeve josportive ndaj kundërshtarëve, tani ka filluar të bëjë edhe joetikën ndaj gazetarëve. Por është puna e vet. Përshëndetje!”, tha Sako duke bërë me dorë nga kamera për të përshëndetur në këtë mënyrë të pazakontë trajnerin shkodran.
