Sfida e Grupit B të Kategorisë së Dytë mes Maliqit dhe Eagle Football, e mbyllur në barazim 2-2, është shoqëruar me momente tensioni në minutat e fundit. Gjithçka nisi në minutën e 85-të pas një përplasjeje mes dy futbollistëve, Bikatal i ekipit mik dhe Ibrahim i vendasve.
Situata u përshkallëzua kur presidenti i Eagle Football, Andi Matraxhiu, hyri në fushën e lojës duke kërkuar tërheqjen e skuadrës së tij, veprim që solli ndëshkimin e tij me karton të kuq nga arbitri Bekris Dragusha.
Pas disa minutash ndërprerje, loja rifilloi dhe u mbyll rregullisht, ndërsa arbitri ndëshkoi me kartonë të verdhë tre lojtarë të përfshirë në debat.
Pas ndeshjes, Matraxhiu reagoi publikisht në rrjetet sociale duke akuzuar shefin e arbitrave, Sokol Jareci, për menaxhimin e situatës dhe duke kontestuar dy penalltitë e akorduara në favor të Maliqit, të cilat u shndërruan në gola nga futbollisti Pero.
Ky incident pason precedentin e fundit në Superiore, ku Egnatia u penalizua rëndë nga Disiplina pas tërheqjes nga fusha në ndeshjen ndaj Vllaznisë.
