Irani rrezikon seriozisht të mos marrë pjesë në Botëror pas përshkallëzimit të konfliktit ushtarak me SHBA-të dhe Izraelin, situatë e cila ka vënë në pikëpyetje pjesëmarrjen e tyre në aktivitetin që nis më 11 qershor.
Edhe drejtuesit e Federatës iraniane e shohin pa shpresë prezencën në këtë kompeticion, duke bërë që vëmendja të kthehet te skuadra që mund t’i zëvendësojë.
FIFA ende nuk ka dalë me një njoftim zyrtar, por burime jozyrtare tregojnë se Iraku mund të jetë ekipi që do të plotësojë Grupin G, ku bëjnë pjesë Belgjika, Zelanda e Re dhe Egjipti. Sipas këtij skenari, Emiratet e Bashkuara Arabe do të merrnin vendin e Irakut në fazën “play-off” kundër Bolivisë ose Surinamit.
Ndërkohë, mbetet e paqartë nëse do të ketë një “ripeshkim” për ndonjë prej kombëtareve të mëdha që mund të eliminohen gjatë fazës kualifikuese të marsit. Për momentin, prioritet mbetet siguria e jetës së njerëzve, ndërsa sporti ka kaluar në plan të dytë në të gjithë rajonin.
FIFA pritet të marrë një vendim përfundimtar në javët në vijim për të sqaruar fatin e Grupit G.
