Një krizë e brendshme dhe mungesa e harmonisë po ndikojnë negativisht te skuadra e Vllaznisë pas nisjes së fazës “Final Four”. Ish-futbollisti shkodran, Luan Shpuza, ka bërë një analizë të situatës ku ka radhitur disa nga faktorët kryesorë që kanë sjellë këtë rënie të ekipit.
Sipas tij, problemet e mëdha financiare janë një nga pikat më kritike, pasi lojtarët kanë marrë vetëm dy paga përgjatë një periudhe tetëmujore. Kjo situatë është rënduar edhe më shumë nga trajtimi i diferencuar, ku vetëm dy anëtarë të skuadrës janë paguar rregullisht.
Përveç anës financiare, brenda grupit ka pasur përçarje dhe konflikte të ashpra fizike, siç ishte rasti i përplasjes mes lojtarëve Bismark dhe Bajrami.
“Situata te Vllaznia dihet se nuk është krejt normale. Siç e nisëm të gjithë, kemi pasur euforinë e zakonshme që e kemi prej 4-5 vitesh. Vllaznia nga euforia e madhe, nga dehja që do dalim kampion, nga dëshira e madhe e shumë shkodranëve që është edhe e imja personale, për momentin ka gabuar shumë pika.
Qysh në momentin që ka probleme financiare në radhë të parë. Sepse ka 8 muaj që merren vetëm 2 rroga dhe e keqja e madhe është që është përçarë, që me Bismark. Bismark kishte grindje, janë rrahur në ekip disa ditë më parë, me Bajramin. Dhe kanë pasur shumë konflikte brenda, që dy vetë marrin rrogat, të gjithë të tjerët nuk marrin rroga”, deklaroi Shpuza.
Sipas ish-lojtarit, humbja e unitetit u konfirmua qartë edhe në ndeshjen e fundit kundër Dinamos. Aktualisht, mungesa e korrektësisë nga drejtuesit ka bërë që skuadra të mos funksionojë si një grup i bashkuar në këtë fazë vendimtare.
“Pra problemi është që ka një krizë të brendshme, nuk është në harmoni ekipi siç ishte deri pak kohë më parë, si e pritnim të gjithë. Në aspektin teknik, trajneri i ka vendosur në pah oshilacionet dhe ka pasur debate me shumë njerëz, por nuk është e drejtë që presidenti t’ia lërë stafin e trajnerit dopio gjashtën në dorë. Pra Vllaznia nuk ka qenë korrekte, presidenti nuk ka qenë korrekt.
Dhe në ndeshjet e fundit, që me Bylisin, me Flamurtarin atje, se me Flamurtarin këtu e përdorën si patën qejf vetë, me Vorën atje barazim… prapë kaluam në Final 4. Aty nuk treguam veten me Dinamon se kush jemi. Pra ka diçka që nuk ecën, ekipi nuk është në unitet dhe harmoni të plotë”, deklaroi Shpuza.
