Sulmuesi i kombëtares shqiptare, Jasir Asani, ka ndërprerë zyrtarisht kontratën me klubin iranian Esteghlal për shkak të mospagesës së detyrimeve financiare të sezonit të kaluar.
31-vjeçari i lindur në Shkup e ka njoftuar vendimin e tij përmes një letre zyrtare drejtuar drejtuesve të klubit, duke u shpallur tashmë lojtar i lirë.
Gjatë eksperiencës së tij me skuadrën nga Lindja e Mesme, Asani regjistroi 29 paraqitje, ku arriti të shënonte 13 gola dhe të dhuronte 4 asistime.
Për shkak të situatës së tensionuar dhe luftës në rajon, lojtari humbi edhe vendin e tij në kombëtaren kuqezi, duke mos u aktivizuar që prej fundit të muajit shkurt. Tashmë sulmuesi i krahut është në kërkim të një ekipi të ri për të vazhduar karrierën e tij profesionale.
Vetë futbollisti ka deklaruar më parë se ka tërhequr vëmendjen e disa klubeve që luajnë në elitën e futbollit spanjoll.
