Klubi i Tiranës është detyruar që të shlyejë të gjitha detyrimet e prapambetura ndaj ish-lojtarëve për të zhbllokuar merkaton në FIFA.
Bardheblutë kishin 6 gjyqe të humbura dhe për secilin prej tyre, ishte në fuqi një vendim i bllokimit të merkatos për tre dritare deri në pagesën e plotë të detyrimit të prapambetur.
Pas ndryshimeve të shumta që bëri klubi në verë, bardheblutë janë vënë në lëvizje në ditët e fundit dhe kanë nisur të bëjnë pagesat. Kështu, brenda 3 ditëve, nga 6 çështjet e hapura në FIFA, tashmë ka mbetur vetëm një e tillë.
Me mbylljen edhe të asaj çështje dhe shlyerjen e detyrimit, Tirana do të ketë mundësinë të federojë lojtarët e rinj dhe të mos turpërohet në kampionat në javën e parë ndaj Egnatias, pasi nga ekipi i sezonit të kaluar i kanë mbetur vetëm 10 lojtarë.
