Rimal Haxhiu i ka dhënë fund aventurës së tij me fanellën e Tiranës për të nisur një kapitull të ri në karrierë.
Mesfushori anësor 27-vjeçar largohet nga Kategoria Superiore për të vazhduar përvojën e tij në futbollin kosovar.
Gjatë periudhës së tij te bardheblutë, Haxhiu zhvilloi gjithsej 127 ndeshje zyrtare dhe mbajti edhe shiritin e kapitenit. Megjithëse luajti në çdo pozicion ku iu kërkua dhe dha maksimumin në fushë, ai nuk arriti të fitonte plotësisht zemrat e tifozëve kryeqytetas.
Sipas raportimeve më të fundit nga mediat në Kosovë, futbollisti ka arritur marrëveshjen për t’u bashkuar me klubin e Malishevës.
Skuadra kosovare ra në sy gjatë kësaj vere për paraqitjen e saj në Conference League, ku arriti të eliminonte Vllazninë. Me këtë lëvizje, Haxhiu pritet të jetë një përforcim me përvojë për repartin e avancuar të Malishevës.
