Komisioni i Disiplinës ka publikuar masat ndëshkimore lidhur me ngjarjet e fundit në futbollin shqiptar, ku bien në sy dënimet e trajnerit të Dinamos, Ilir Daja, dhe masat ekstreme ndaj ekipeve të moshave pas derbit Partizani-Tirana.
Tekniku i kryeqytetasve u ndëshkua me katër ndeshje pezullim për sjellje josportive ndaj arbitrit Enea Jorgji, por ky dënim është i pjesshëm dhe gjysma e tij mund të shlyhet me kusht për një periudhë gjashtëmujore. Me katër ndeshje pezullim u dënua gjithashtu zyrtari i Besës, Romeo Bishdili, për hyrje të paautorizuar në fushë.
Gjithashtu, një sërë skuadrash si Bylis U-19, Flamurtari U-16, Kamza Sport U-16, Flamurtari U-15, Kamza 07 U-14, Kamza Sport B U-16 dhe TR 19 Academy U-17 u ndëshkuan me gjoba nga 100.000 lekë dhe humbje të ndeshjeve në tavolinë me rezultatin 3-0 për shkak të braktisjes së lojës.
Ndërkohë, incidentet e rënda dhe sherri masiv në derbin e 18-vjeçarëve mes Partizanit dhe Tiranës sollën dënime drastike për lojtarët dhe klubet respektive. Klubi i Partizanit U-18 u gjobit me 400.000 lekë dhe detyrohet të luajë katër ndeshje pa tifozë për dështim në garantimin e rendit, ndërsa lojtarët e përfshirë në përleshje nga të dyja kampet morën pezullime të gjata që variojnë nga tri deri në tetë ndeshje.
