Chelsea po përgatitet për një tjetër ndryshim të madh pas një sezoni zhgënjyes në Premier League. Skuadra londineze ndodhet aktualisht në vendin e nëntë në renditje dhe jashtë çdo kompeticioni europian, ndërsa drejtuesit e klubit kanë nisur punën për ndërtimin e një projekti të ri për sezonin e ardhshëm. Pas largimit të trajnerit Liam Rosenior, klubi është në kërkim të një emri që mund të rikthejë stabilitetin dhe rezultatet në Stamford Bridge.
Një nga kandidatët që po fiton gjithnjë e më shumë terren për pankinën e Chelseat është Xabi Alonso. Trajneri spanjoll u largua këtë vit nga Real Madridi, duke mbyllur një aventurë që nuk arriti objektivat e vendosura nga klubi madrilen. Megjithatë, pavarësisht eksperiencës jo shumë pozitive në Spanjë, emri i tij vazhdon të vlerësohet lart në futbollin europian.
Reputacioni i Alonsos u rrit ndjeshëm gjatë periudhës së tij te Bayer Leverkusen. Spanjolli arriti ta transformonte skuadrën gjermane në një ekip dominues dhe tejet konkurrues në Gjermani dhe Europë, duke marrë vlerësime të jashtëzakonshme për organizimin e lojës dhe stilin modern që aplikoi. Pikërisht këto elementë kërkon edhe Chelsea, skuadër që në vitet e fundit ka investuar shuma marramendëse në merkato, por që ka vuajtur mungesën e stabilitetit në rezultate dhe identitetit në lojë.
Drejtuesit londinezë besohet se e shohin Alonson si trajnerin ideal për të ndërtuar një projekt afatgjatë. Chelsea synon të rikthehet sa më shpejt mes skuadrave pretendente në Premier League dhe në kompeticionet europiane, ndërsa profili i trajnerit spanjoll konsiderohet i përshtatshëm për të menaxhuar një skuadër të re dhe me shumë talente.
Një tjetër element që favorizon kandidaturën e tij është njohja e mirë e futbollit anglez. Gjatë karrierës si futbollist, Alonso ishte një nga lojtarët më të rëndësishëm të Liverpool-it. Me skuadrën nga “Anfield” ai fitoi Champions League në vitin 2005, në finalen legjendare të Stambollit ndaj Milanit, një nga ndeshjet më dramatike në historinë e këtij kompeticioni.
Eksperienca në Premier League dhe puna e tij e suksesshme si trajner në Gjermani e bëjnë Alonson një nga emrat më të kërkuar në treg. Chelsea pritet të marrë një vendim në javët e ardhshme për timonierin e ri, ndërsa drejtuesit e klubit synojnë të shmangin me çdo kusht një tjetër sezon pa objektiva dhe jashtë garës për trofe.
