Xhonatan Lajthia pritet të largohet nga skuadra e Elbasanit gjatë këtij muaji për shkak të mungesës së marrëveshjes për rinovimin e kontratës.
Futbollisti 27-vjeçar, i cili iu bashkua klubit në vitin 2024 nga Bylisi, u shndërrua në një nga lojtarët kryesorë të ekipit duke shënuar 10 gola gjatë këtij edicioni në Superiore.
Palët kanë hasur në mosmarrëveshje financiare, pasi lojtari kërkon një pagë mujore prej rreth 10 milionë lekësh, ndërsa drejtuesit elbasanas ofrojnë vetëm gjysmën e kësaj shifre për të ruajtur balancat e buxhetit.
Në këtë situatë ka ndërhyrë klubi i Teutës, i cili ka nisur bisedimet me futbollistin për ta bërë pjesë të projektit të ri nën drejtimin e trajnerit Edon Tetova. Përveç interesit nga skuadra bregdetare, mesfushori me tipare sulmuese po monitorohet me interes edhe nga disa klube jashtë vendit.
Tratativat mes lojtarit dhe skuadrave të interesuara pritet të konkretizohen përpara fillimit të fazës përgatitore.
