Sezoni i Besës në Kategorinë e Parë po shkon gjithnjë e më keq dhe sot ka marrë goditjen e radhës me humbjen 2-0 përballë Apolonisë. Një humbje që e ka lënë përsëri në zonë e ftohtë të klasifikimit, duke rrezikuar rënien dhe jo duke luftuar për ngjitjen, siç ishte projektuar gjatë verës
Kjo ishte humbja e 6 e këtij sezoni për Besën dhe ka sjellë edhe “kapitullimin” e Shpëtim Duros, i cili në mbyllej të sfidës, ka dhënë dorëheqjen nga drejtimi i skuadrës. Tekniku i njohur mori ekipin pas javëve të para të kampionatit me shpresën për ta ringritur në majë.
Por skuadra vazhdoi të zhgënjente dhe regjistroi dështim pas dështimi, duke mbetur gjithmonë e rrezikuar për rënien. Kësisoj, Duro ka vendosur ta mbyllë këtu me ekipin kavajas, teksa prej javësh kishte pranuar hapur vështirësitë që kishte për të drejtuar këtë grup lojtarësh me të cilët u ishte gëzuar vetëm 3 fitoreve.
Tani pritet të mësohet se kush do të marrë drejtimin e Besës, në kërkim të trajnerit të tretë të sezonit pas Emiljano Çelës dhe Shpëtim Duros, edhe pse nuk është arritur ende as gjysma e tij.
