Federata Shqiptare e Futbollit ka njoftuar mbylljen e bashkëpunimit me trajnerin brazilian Silvinjo, i cili nuk do të jetë më në krye të Kombëtares shqiptare.
Vendimi vjen pas dështimit të negociatave për rinovimin e kontratës, e cila skadonte në korrik. Largimi i 52-vjeçarit vjen menjëherë pas mbylljes së fushatës kualifikuese të Kupës së Botës 2026, ku Shqipëria arriti një sukses historik duke prekur fazën “play-off”, por u eliminua në gjysmëfinale nga Polonia me rezultatin 2-1 në Varshavë.
Gjatë aventurës së tij që nisi në janar të vitit 2023, udhëheqja e Silvinjos regjistroi 15 fitore, 7 barazime dhe 12 humbje në 34 ndeshje, duke pasur si pikë kulmore kualifikimin në Euro 2024. Ky ndryshim vjen vetëm pak ditë para dy ndeshjeve miqësore të qershorit që kuqezinjtë do të luajnë në Tiranë ndaj Izraelit dhe Luksemburgut.
FSHF ka njoftuar një konferencë të jashtëzakonshme për shtyp sot në orën 10:00 në “Shtëpinë e Futbollit”, ku pritet të zyrtarizohet ndarja dhe të prezantohet pasuesi i tij, i cili sipas zërave të parë do të jetë një teknik italian.
