Skuadra e Milanit ndodhet shumë pranë arritjes së objektivit kryesor sezonal, megjithatë e ardhmja e pankinës kuqezi mbetet e pasigurt. Trajneri Max Allegri po udhëheq ekipin drejt rikthimit në Champions League, por ky sukses mund të mos jetë i mjaftueshëm për konfirmimin e tij për edicionin e ardhshëm.
Pas fitores së fundit të arritur në transfertën ndaj Genoas, kuqezinjtë kanë mbajtur një vend mes katër më të mirëve të kampionatit. Tashmë, atyre u mjafton një fitore të dielën e ardhshme në stadiumin “San Siro” ndaj Cagliari-t për të siguruar kualifikimin. Arritja e këtij suksesi do të aktivizonte automatikisht rinovimin e kontratës së teknikut me një rritje të ndjeshme të pagës së tij. Sipas kushteve të reja, paga e tij do të shkonte në 6 milionë euro në vit, me një marrëveshje të vlefshme deri në vitin 2028.
Ky detyrim financiar e bën të ndërlikuar vendimin e pronarit Gerry Cardinale për një shkarkim të mundshëm të trajnerit nga detyra. Pagesa e lartë e teknikut aktual, e kombinuar me koston e pasardhësit të tij, do të rëndonte shumë mbi arkat e klubit. Megjithatë, i gjithë ky skenar mund të përmbyset nëse vetë Allegri do të vendosë të largohet vullnetarisht nga drejtimi i kuqezinjve.
Gjatë konferencave dhe ndeshjeve të fundit, trajneri është shfaqur i lodhur nga tensioni i një sezoni që doli më i vështirë se parashikimet. Për më tepër, pjesëmarrja në dy kompeticione do të kërkojë përforcime të shumta në organikë, e cila u shfaq e limituar këtë vit. Pika kyçe e qëndrimit të tij do të jetë kërkesa për garanci teknike mbi ndërtimin e një grupi konkurrues për trofe.
Në këtë situatë ndikon ndjeshëm edhe klima dhe marrëdhëniet e brendshme brenda strukturave të klubit. Allegri ka konfirmuar harmoninë e plotë me drejtorin sportiv shqiptar, Igli Tare, i cili gjithsesi po shkon drejt largimit. Nga ana tjetër, janë përforcuar zërat për një thyerje të raporteve të tij me Zlatan Ibrahimovic-in.
