Përmes një postimi të gjatë në rrjetet sociale, boksieri shqiptar, Jurgen Uldedaj, ka dhënë lajmin e keq se ndeshja për titullin “IBO World Cruiserweight Champion” ndaj Blake Caparello, e planifikuar më datën 23 tetor, Tiranë, është shtyrë për shkak të një problemi të vogël fizik. Po ashtu, një tjetër arsye përkon me gjendjen shqetësuese në Tiranë, protestat masive.
“Me keqardhje, ju njoftoj se ndeshja ime për mbrojtjen e titullit botëror IBO World Cruiserweight Champion, e planifikuar më 23 tetor në Tiranë, shtyhet për një datë të re brenda vitit 2026.
Për shkak të një dëmtimi të vogël gjatë sparring-ut dhe të situatës që po përjeton vendi ynë, vendimi është koordinuar me IBO-në dhe është marrë me mirëkuptimin e Blake Caparello dhe timin.
Për mua, Shqipëria është mbi çdo titull dhe fitore personale. Nuk do ta ndieja të drejtë të festoja në ring, ndërsa bashkëkombësit e mi protestojnë për të drejtat e tyre dhe vendi kalon momente të vështira.
Respektoj të drejtën e qytetarëve për të ngritur zërin dhe vlerësoj Policinë e Shtetit në punën e vështirë për të ruajtur rendin dhe sigurinë.
Ëndrra ime për ta mbrojtur titullin në atdhe vazhdon. Do të kthehem në ring për të ngritur lart flamurin kuqezi, në një moment kur të gjithë të mund ta përjetojmë këtë ngjarje me krenari.
Sot, më shumë se kurrë, Shqipëria ka nevojë për qetësi dhe respekt. Faleminderit për mbështetjen dhe mirëkuptimin! Jurgen Uldedaj”, shkruan boksieri shqiptar.
Më herët, Uldedaj ka bërë të ditur se ndaj rivalit Blake Caparello do të jetë ndeshja më e rëndësishme në karrierë, por që do të duhet të presë një moment të dytë.
