Lajme të këqija vijnë nga kampi i Tiranës në prag të nisjes së sezonit të ri në Superiore.
Klubi bardheblu nuk ka arritur të zhbllokojë në kohë merkaton e verës në FIFA. Për këtë arsye, stafi teknik nuk do të ketë të gatshëm asnjë nga afrimet e reja për sfidën ndaj Egnatias.
Pengesa kryesore ka ngecur te konfirmimi i pagesës së fundit në drejtim të ish-trajnerit Roberto Bordin.
Edhe pse klubi kryeqytetas e ka kryer transaksionin, tekniku italian nuk e ka konfirmuar ende marrjen e shumës në sistem.
Si rrjedhojë, emra si Ardit Krymi, Bernard Berisha apo Drilon Hazrollaj do ta ndjekin ndeshjen vetëm nga shkallët e stadiumit.
Në këtë situatë, kryeqytetasit detyrohen të zbresin në fushë me organikën e mbetur nga edicioni i kaluar.
Nga ana tjetër, edhe Egnatia pritet të bëjë rrotacion në formacion për shkak të angazhimeve të saj në kupat e Evropës.
