Lionel Messi
Lionel Messi ka bërë një tjetër arritje historike në karrierën e tij. Në ndeshjen e fundit të zhvilluar në kampionatin amerikan, argjentinasi realizoi dy gola të tjerë dhe dha dy asistime, duke ndihmuar ekipin e Inter Miami të fitojë me rezultatin 5-1 ndaj New York Red Bulls.
Me këto dy gola, Messi arriti kuotën e 764 golave të shënuar, duke përjashtuar ato nga penalltitë. Ky është aktualisht rekordi më i lartë botëror për gola të shënuar, duke kaluar rivalin e tij të përhershëm, Cristiano Ronaldon, i cili numëron 763 gola. Duhet theksuar se Mesi këtë shifër e ka arritur në 167 ndeshje më pak se portugezi.
Forma e argjentinasit mbetet në nivele të larta, pasi në shtatë ndeshjet e fundit ai ka realizuar gjashtë herë nga dy gola, duke ruajtur vazhdimësinë në paraqitjet individuale dhe në ndihmën që i jep skuadrës.
Në të gjithë karrierën e tij, Messi ka shënuar 872 gola në ndeshje zyrtare, ndërkohë që Ronaldo numëron 938, por me një diferencë të konsiderueshme në numrin total të ndeshjeve të zhvilluara, përkatësisht 168 më shumë për Ronaldon.
