Victor Osimhen
Victor Osimhen është pranë kalimit te Galatasaray, teksa ka mbetur vetëm firma për ta bërë zyrtare marrëveshjen. Sulmuesi nigerian dhe klubi turk kanë rënë dakord për një kontratë katërvjeçare me pagë mes 16 dhe 18 milionë euro në sezon.
Pika më e vështirë ka qenë negociata me Napolin, që ka kërkuar kushte të rrepta financiare dhe garanci për shitjen. Marrëveshja është arritur për një total prej 80 milionë eurosh: 40 menjëherë, 35 me dy këste brenda një viti dhe 5 milionë si bonuse.
Napoli përfiton edhe 10% nga shitja e ardhshme, si dhe ka përfshirë një klauzolë që ndalon kalimin e Osimhen në klube italiane deri më 2027, përndryshe Galatasaray duhet të paguajë 30 milionë shtesë.
Të gjitha palët kanë qenë të angazhuara për ta realizuar transferimin. Dokumentacioni është në përfundium dhe prezantimi zyrtar pritet të ndodhë të premten.
