Muric largohet nga Sassuolo, rikthehet në Angli

Arijanet Muric pritet të largohet nga Sassuolo në fund të sezonit dhe të rikthehet te Ipswich Town, klubi që zotëron kartonin e portierit të përfaqësueses së Kosovës. Edhe pse gardiani “dardan” ka bindur me paraqitjet e tij në Serie A, duket se e ardhmja e tij nuk do të jetë në futbollin italian. Vendimi raportohet të jetë marrë nga vetë lojtari, i cili nuk dëshiron të vazhdojë qëndrimin te Sassuolo edhe për sezonin e ardhshëm.

27-vjeçari zhvilloi një sezon pozitiv me skuadrën italiane, ku në disa raste u shndërrua në një nga lojtarët më të rëndësishëm të ekipit. Një nga paraqitjet më të spikatura ishte ajo në barazimin 1-1 ndaj Juventusit, sfidë në të cilën Muric priti një penallti vendimtare në minutat e fundit të takimit. Performanca e tij në atë ndeshje u vlerësua si një nga më të mirat e sezonit.

Deri në këtë fazë të kampionatit, portieri ka zhvilluar 32 ndeshje me fanellën e Sassuolos në të gjitha kompeticionet. Ai ka arritur ta mbajë portën të paprekur në gjashtë raste dhe në disa prej sfidave është vlerësuar edhe si lojtari më i mirë në fushë. Paraqitjet e tij kishin bindur fillimisht drejtuesit e klubit italian, të cilët kishin në dispozicion një opsion blerjeje prej 10 milionë eurosh në fund të sezonit.

Megjithatë, situata ndryshoi në javët e fundit. Muric qëndroi në stol në tre ndeshje radhazi dhe vetëm fundjavën e kaluar u rikthye në formacion në sfidën ndaj Torinos. Pikërisht kjo periudhë ulje-ngritjesh duket se ka ndikuar në vendimin e tij për të mos vazhduar aventurën në Serie A dhe për të kërkuar një tjetër mundësi pas përfundimit të kampionatit.

Sassuolo do të luajë edhe dy ndeshjet e fundit të sezonit ndaj Lecce-s dhe Parmës, takime që pritet të jenë edhe të fundit për Muric me fanellën e skuadrës italiane. Pas kësaj, ai do të rikthehet te Ipswich, aty ku kontrata e tij mbetet ende aktive.

Karriera e portierit në Angli ka pasur momente sfiduese. Pas eksperiencës me Burnley, ai kaloi te Ipswich Town, por fillimi i aventurës në futbollin anglez nuk ishte i lehtë, ku disa gabime në ndeshjet e para ndikuan në humbjen e vendit të titullarit në Premier League. Huazimi te Sassuolo i dha mundësinë për të rigjetur vazhdimësinë dhe formën e tij më të mirë, ndërsa tani mbetet për t’u parë se cili do të jetë hapi i ardhshëm në karrierën e 27-vjeçarit.