Ndeshja mes Shqipërisë dhe Anglisë kishte rëndësi të vogël sportive, pasi të dyja skuadrat e kishin të përcaktuar fatin e tyre në kualifikueset e Botërorit 2026. Megjithatë, për Federatën Shqiptare të Futbollit, kjo sfidë pati një ndikim të madh financiar. FSHF ka arkëtuar shifra shumë të larta vetëm nga shitja e biletave, të cilat kishin çmimet më të larta të regjistruara ndonjëherë për një ndeshje të luajtur në Shqipëri.
Sipas përllogaritjeve, janë grumbulluar rreth 169.498.000 lekë nga mbi 20 mijë bileta të hedhura në treg, duke përfshirë edhe sektorin e tifozëve miq. Çmimet e tyre varionin nga 2.500 deri në 50.000 lekë, ndërsa një pjesë e konsiderueshme e biletave, si ato të sektorëve të veçantë apo VVIP, administrohen drejtpërdrejt nga FSHF dhe nuk dalin në shitje publike. Totali i të ardhurave të llogaritura përkthyer në euro kap shifrën e rreth 1.75 milionë eurove.
Duke shtuar edhe vlerën e biletave që nuk janë përfshirë në përllogaritjen fillestare, të cilat e çojnë kapacitetin në rreth 22 mijë vende, arkëtimet pritet të afrohen ose të kalojnë 2 milionë euro. Kjo e vendos këtë takim si ndeshjen me arkëtimin më të lartë në historinë e futbollit shqiptar.
