Fokusi i madh i Egnatias në garat europiane ka sjellë nevojën për ndryshime në kalendarin e javëve të para të Superiores.
Për shkak të ecurisë pozitive, kampionët e Shqipërisë kanë siguruar minimumi fazën “play-off” të Ligës së Konferencës, çka krijon një përplasje të drejtpërdrejtë me axhendën e kampionatit në fund të muajit gusht.
Ndeshja e parë e programuar për datën 22 gusht mes Egnatias dhe Tiranës në Rrogozhinë, si dhe takimi i javës së dytë mes Vorës dhe Egnatias më 29 gusht, do të pësojnë ndryshime të cilat pritet të konfirmohen zyrtarisht nga Federata Shqiptare e Futbollit.
Rrugëtimi europian i rrogozhinasve parashikon ndeshje vendimtare pikërisht në këto data, ku takimet e para të fazës “play-off” në Ligën e Europës ose të Konferencës do të luhen më 20 gusht, ndërsa ato të kthimit më 27 gusht (apo 18/19 dhe 25/26 gusht në rast kualifikimi në Champions).
