Humbja me rezultatin 2-0 në derbin kundër Partizanit ka sjellë pasiguri për të ardhmen e trajnerit të Tiranës, Ardian Nuhiju, i cili është pranë shkarkimit.
Rezultati i fundit ka bërë që drejtuesit e klubit bardheblu të shqyrtojnë pozicionin e teknikut në krye të pankinës.
Në skenë ka dalë emri i Orges Shehit si një kandidat potencial për të marrë drejtimin e skuadrës në rast të një largimi të mundshëm të Nuhijut.
Ish-trajneri kampion i Tiranës u pa i pranishëm në tribunën e stadiumit “Air Albania” gjatë ndeshjes së djeshme.
Shehi, i cili aktualisht është pa skuadër, ka një histori suksesi me klubin kryeqytetas, ku fitoi titullin kampion në sezonin 2021/22 dhe Superkupën në sezonin pasardhës.
Deri më tani nuk ka një njoftim zyrtar për ndryshime në staf, por prezenca e ish-trajnerit në derbi ka shtuar zërat për një rikthim të mundshëm.
