Johan Cortes është kthyer në një çështje te skuadra e Tiranës pas sjelljes së shfaqur gjatë derbit kundër Partizanit, i cili u mbyll me rezultatin 2-0 në favor të të kuqve.
Mbrojtësi 26-vjeçar nga Kosta Rika shfaqi pakënaqësi të hapur në momentin e zëvendësimit, duke goditur pankinën në shenjë revolte ndaj vendimit të trajnerit Ardian Nuhiu.
Ky veprim i lojtarit u regjistrua nga kamerat televizive dhe u pasua nga një ndërhyrje e menjëhershme e teknikut Nuhiu për të qetësuar situatën në zonën teknike.
Pavarësisht përpjekjes për të shuar tensionin në moment, ky reagim pritet të ketë pasoja zyrtare për futbollistin brenda klubit bardheblu. Burime pranë ekipit bëjnë me dije se ndaj Cortes do të merret një masë disiplinore, si reagim ndaj thyerjes së rregullave të sjelljes.
Drejtuesit e Tiranës synojnë të përçojnë mesazhin se disiplina dhe interesi i grupit qëndrojnë mbi çdo individ në skuadër. Ky incident vjen në një moment delikat për ekipin, i cili po përballet me presionin e rezultateve pas humbjes në sfidën më të rëndësishme të kryeqytetit.
