Klubi i Lazios ka mbuluar nevojat e listës zyrtare për pjesën e dytë të sezonit përmes disa lëvizjeve strategjike në merkaton e janarit.
Strategjia e re e klubit u fokusua në largimin e disa lojtarëve me moshë të madhe dhe afrimin e futbollistëve nën moshën 23-vjeçare. Ky proces ka krijuar hapësira të reja në listën e ekipit, duke mundësuar rregullimin e pozicionit të lojtarëve që ishin lënë jashtë më parë.
Mbrojtësi i Kombëtares shqiptare, Elseid Hysaj, është përfshirë zyrtarisht në këtë listë pas periudhës së mbetjes jashtë për shkak të dëmtimit në nëntor. Së bashku me të, në dispozicion të trajnerit Sarri është rikthyer edhe mesfushori Dele-Bashiru.
Pavarësisht zërave për një largim të mundshëm gjatë janarit, Hysaj do të qëndrojë në Romë deri në mbyllje të këtij edicioni.
Kontrata e futbollistit shkodran me bardhekaltrit përfundon në fund të sezonit, kohë kur pritet të zgjedhë një destinacion të ri.
