Fitorja e Barcelonës ndaj Albacete-s në Kupën e Mbretit është shoqëruar me një skandal të pazakontë që po bën xhiron e rrjeteve sociale.
Megjithëse katalanasit siguruan kualifikimin në gjysmëfinale, vëmendja e të gjithëve është përqendruar te arbitri Munuera dhe sjellja e tij e pashpjegueshme.
Gjatë një aksioni të rrezikshëm të Albacete-s në minutat e fundit, arbitri u kap nga kamerat duke bërë gjeste që ngjanin si festim për golin që po vinte. Vetëm ndërhyrja shpëtimtare e mbrojtësit Gerard Martin, i cili devijoi topin në momentin e fundit, e bëri arbitrin të ndryshonte menjëherë qëndrim dhe të merrte një profil serioz.
Ky moment ka sjellë një valë reagimesh të ashpra nga tifozët e Barcelonës, të cilët e kanë cilësuar veprimin e tij si dëshmi të qartë të anshmërisë. Akuzat për një arbitër të “shitur” kanë shpërthyer në platformat sociale, duke vënë në dyshim profesionalizmin e gjyqtarit në një ndeshje kaq të rëndësishme.
