Teksa Kombëtarja shqiptare dhe tifozët kuqezj kanë nisur numërimin mbrapsht për sfidën vendimtare të 26 marsit me Poloninë, e vlefshme për “Play Off”-in e Botërorit, nga Anglia kanë ardhur lajme jo të mira për Armando Brojën.
Deklarata e trajnerit të Burnley, Skot Parker, në prag të ndeshjes me Chelsea-n, ka futur në ankth Silvinjon dhe stafin e tij.
“Ai nuk do të luajë këtë fundjavë sepse ka një problem fizik. Është duke e shqetësuar prej kohësh, në fakt, dhe duhet të merrnim masa. Do të mungojë për disa javë të tjera, por uroj që të rikthehet shpejt”, tha Parker.
Pavarësisht se trajneri nuk e ka bërë të qartë kohën e qëndrimit jashtë fushave të lojës, Broja është në luftë me kohën për duelin e Varshavës, mbi të gjitha për të kapur formën optimale. Ai po punon në mënyrë individuale për t’u rikuperuar sa më shpejt.
Në këtë sezon në Premier League ka luajtur vetëm 952 minuta, ku ka shënuar një gol dhe ka dhënë 2 asiste në të gjitha kompeticionet, por ka qenë shumë larg rendimentit dhe pritshmërive për shkak të problemeve fizike të shumta që e kanë shoqëruar.
Situatë kjo që është reflektuar edhe në Kombëtaren shqiptare, ku 24-vjeçari u limitua vetëm me një asist kundër Andorrës në eliminatoret e Botërorit.
