Vllaznia ka arritur një tjetër marrëveshje të rëndësishme në merkaton e verës, duke siguruar shërbimet e futbollistit shkodran Amin Tahiri.
Skuadra e drejtuar nga Edi Martini ka gjetur akordin me 21-vjeçarin dhe tashmë pritet vetëm zyrtarizimi i lëvizjes. Tahiri, i cili luan si mesfushor ofensiv dhe sulmues i dytë, vjen për të shtuar konkurrencën dhe alternativat në fazën sulmuese të kuqebluve.
Karriera e tij nisi në akademinë e njohur të Torinos në Itali, për të vazhduar më pas me përvoja te Feralpisalo, Slovan B dhe Brinje. Gjithashtu, gjatë sezonit 2024-2025 ai pati edhe një përvojë të shkurtër me Tiranën në futbollin shqiptar.
Kjo do të jetë hera e parë që talenti 21-vjeçar do të veshë fanellën e klubit të qytetit të tij të lindjes para tifozëve shkodranë.
Ndërkohë, drejtuesit e Vllaznisë nuk e konsiderojnë merkaton të mbyllur dhe po punojnë për afrime të tjera cilësore për edicionin 2026-2027.
