Egnatia pritet të përballet me ndryshime në përbërjen e skuadrës gjatë merkatos së janarit. Portieri
Mario Dajsinani është një nga lojtarët kryesorë që ka marrë oferta konkrete për t’u larguar nga kampionët në fuqi.
Sipas RTSH përpara ndeshjes me Elbasanin, për gardianin ka shprehur interes klubi polak i Legias së Varshavës. Shifra e propozuar për kartonin e lojtarit thuhet se arrin vlerën e 800 mijë eurove.
Drejtuesit e klubit rrogozhinas janë duke shqyrtuar këtë propozim financiar për një nga shtyllat e ekipit. Largimi i mundshëm i Dajsinanit do të kërkonte ndërhyrje të menjëhershme në tregun e transferimeve për të gjetur një zëvendësues.
Aktualisht mbetet në pritje vendimi zyrtar i klubit nëse do ta pranojë ofertën polake.
