Partizani ka arritur akordin për shitjen e sulmuesit Diego Contreras, i cili do të vijojë karrierën e tij në kampionatin ukrainas. Futbollisti 22-vjeçar arriti të fitonte një rol të rëndësishëm, ku u dallua veçanërisht për kontributin e tij efikas pas aktivizimit nga stoli i rezervave. Ai e mbylli me ekipin e kuq me një bilanc prej 6 golash të shënuar në rreth 900 minuta lojë të zhvilluara midis përballjeve të kampionatit dhe atyre të kupës.
Kjo performancë tërhoqi vëmendjen e menaxherëve të huaj, duke sjellë përmbylljen e një marrëveshjeje transferimi që plotëson kërkesat financiare të drejtuesve kryeqytetas. Ende nuk janë zbuluar detajet e transferimit në Ukrainë, por mësohet se klubi kryeqytetas ka akëtuar një shifër të kënaqshme.
Paralelisht me këtë lëvizje në dalje, Partizani ka punuar për të garantuar qëndrueshmërinë e organikës ekzistuese për edicionin e ardhshëm futbollistik. Mbrojtësi anësor Albion Marku ka arritur një akord me zyrtarët e klubit për të vazhduar bashkëpunimin edhe për sezonin e ri. Aktualisht, 25-vjeçari ndodhet në një fazë rikuperimi pas një dëmtimi që ka pësuar në zonën e gjurit.
Në të njëjtën linjë, klubi ka arritur akordim edhe për zgjatjen e kontratës me qendërmbrojtësin dhe kapitenin e skuadrës, Marcelino Preka. Futbollisti 22-vjeçar me origjinë nga Shkodra do të jetë pjesë e planeve teknike të ekipit edhe për vitin e ardhshëm. Me këtë rinovim, mbrojtësi shton periudhën e qëndrimit në kryeqytet, duke filluar kështu edicionin e tij të pestë radhazi me fanellën e këtij klubi. Këto zhvillime plotësojnë strategjinë e klubit për të ruajtur boshtin e lojtarëve kryesorë përpara startit të kompeticioneve të ardhshme.
