Partizani nuk shkoi më shumë se barazimi 1-1 ndaj Bylisit në shtëpi, në duelin e javës së 32-të në Superiore.
Një hap fals nga të kuqtë e kryeqytetit, që nuk përfitojnë për të marrë vendin e katërt në renditje. Ndeshja u zhbllokua që në minutën e 2-të nga miqtë, pasi Ferreira përfitoi nga një pasiguri e mbrojtjes vendase dhe kaloi Bylisin në avantazh.
Megjithatë, festa e ballshiotëve zgjati pak. Në minutën e 15-të, Isgandarli fitoi penallti, pas një ndërhyrje të gabuar nga Marku.
Ishte vetë sulmuesi i Partizanit që mori përsipër 11 metërshin dhe e ktheu në gol, duke barazuar shifrat.
Pjesa e parë nuk kishte më ndryshime, pavarësisht rasteve në të dyja portat. Në minutën e 55-të, gjithçka u bë më e vështirë për Partizanin, që mbeti me 10 lojtarë. Ismaili u ndëshkua me karton të kuq, pasi ndali një aksion me dorë.
Pas këtij rasti, ndeshja vazhdoi e qetë dhe me pak raste nga të dyja skuadrat.
Ky barazim, e mban Partizanin në vendin e pestë me 45 pikë, ndërsa Bylis renditet i parafundit me 32 pikë.
