Barazimi 2-2 i Partizanit ndaj Vorës nuk ka sjellë vetëm ndarjen e pikëve, por edhe një mungesë të rëndësishme për stafin teknik të “të kuqve”.
Gjatë takimit të sotëm, Oltijon Kërnaja u ndëshkua me karton të verdhë për protesta, duke plotësuar numrin katër të tyre për këtë sezon. Ky ndëshkim do të thotë se Kërnaja do të jetë i pezulluar për ndeshjen e radhës në kampionat ndaj Teutës.
Momenti i ndëshkimit erdhi në minutën e 42-të, pikërisht kur Vora shënoi golin e avantazhit. Kërnaja pretendoi për një faull të padhënë në favor të Partizanit, aksion i cili solli goditjen e këndit nga ku lindi goli i kundërshtarëve. Gjyqtari Klodian Shahini nuk i toleroi protestat, duke i treguar kartonin e verdhë që do t’i kushtojë prezencën në Durrës.
Sfida ndaj Teutës, e planifikuar për më 21 mars, konsiderohet vendimtare për të dyja skuadrat që synojnë një vend në “Final Four”.
