Portieri i Dinamos, Edmir Sali, po kalon një moment të vështirë në karrierën e tij pas një incidenti të ndodhur së fundmi.
Sipas raportimeve të “Panorama Sport”, gardiani blu është aksidentuar teksa lëvizte me biçikletë, duke pësuar një dëmtim serioz në shpatull. Ky dëmtim mund t’i kushtojë atij mbylljen e parakohshme të sezonit, në rast se ekzaminimet mjekësore do të përcaktojnë se ndërhyrja kirurgjikale është e pashmangshme.
Edhe pse Aldo Teqja mbetet titullari i padiskutueshëm i portës nën drejtimin e Ilir Dajës dhe Sali nuk kishte regjistruar ende asnjë minutë aktivizimi këtë sezon, mungesa e tij prish balancat në organikën e ekipit. Në këto kushte, vendin e tij si alternativë e parë në stol do ta marrë Tomas Kiri.
21-vjeçari do të jetë tashmë mbështetja kryesore për Teqjan në ndeshjet e mbetura, ndërsa stafi mjekësor po monitoron nga afër gjendjen e Salit për të marrë një vendim përfundimtar mbi operacionin.
