Kombëtarja shqiptare ka nisur përgatitjet për ndeshjen ndaj Serbisë, e cila do të luhet më 11 tetor dhe është e vlefshme për kualifikueset e Botërorit.
Kuqezinjtë kanë nisur stërvitjen në “Shtëpinë e Futbollit”, ku katër lojtarë punuan të diferencuar nga pjesa tjetër.
Bëhet fjalë për Ajetin, Dakun, Uzunin dhe Hysajn. Tre të fundit ndërkohë pasi mbaruan vrapin, e mbyllën për ditën e sotme.
Armando Broja ndërkohë mbërriti më vonë se pjesa tjetër e grupit te “Shtëpia e Futbollit” dhe nuk u stërvit me grupin.
Gjithashtu, një tjetër mungesë ishte ajo e Ardian Ismajlit, i cili sot kishte vizitat mjekësore të radhës në Itali për dëmtimin që pësoi pak ditë më parë. Rezultatet e rezonancës magnetike nuk kanë qenë pozitive dhe nuk parashikohet që Ismajli të bëhet pjesë e grumbullimit në ditët në vijim pasi nuk mund të rikuperojë në kohë për të luajtur ndeshjen vendimtare të së shtunës, ndonëse trajneri Silvinjo kishte pritur deri në momentet e fundit për të.
